Samtalar om seksualitet for kvinner.
Sexologisk rådgiving
For mange menneske er seksualitet ein viktig del av livet og kan vere ei kjelde til lyst og glede, intimitet og nærleik. Verdas helseorganisasjon definerer seksualitet som ein del av menneske sin livskvalitet og eit viktig aspekt i forhold til eiga helse.
Når kroppen endrar seg
Forholdet mellom kropp og seksualitet er tett, og det er ikkje uvanleg å få eit annleis forhold til seksuallivet når kroppen blir endra. Det kan skje ved graviditet, fødsel, kroppsleg skade, sjukdom, operasjon, eller behandling. Biverknader av medisinar kan føre til kroppslege endringar som påverkar sjølvbilde, forhold til kropp og relasjon til ein partnar.
Seksualitet er for mange eit sårbart og tabubelagt tema. Like fullt påverkar det eiga oppleving av livskvalitet og er derfor ein viktig faktor i livet for dei fleste av oss. Undersøkingar viser at dei fleste kan ha glede av sitt seksualliv også etter endringar som følge av fødsel, sjukdom eller behandling.